|
Hyfforddi Ieuenctid - Souled Out
CEFNDIR:
BETH YW ‘SOULED OUT’?
Dros y pum mlynedd diwethaf, un o’r
uchafbwyntiau i Staff Coleg y Bala yw cael bod
yn rhan o'r cwrs ‘Souled Out’ sef ein cwrs
hyfforddi i bobl ifanc dros 15 mlwydd oed. Mae
bob amser wedi bod yn dda i groesawu pobl ifanc
o bob rhan o Gymru i ‘Souled Out,’ cwrs sy’n
anelu i feithrin cenhedlaeth newydd o arweinwyr.
SOULED OUT 2004
Yn sicr nid oedd cwrs haf Souled Out 2004 yn
eithriad, a chafwyd wythnos arbennig iawn. Yng
nghanol holl gyffro’r gweithgareddau- pêl droed,
nofio, bowlio deg, a theithiau amrywiol- cawsom
amseroedd bywiog o addoli, yn ogystal â sesiynau
a oedd yn ein bwydo’n ysbrydol ac yn ein herio.
Fe siaradodd Andy â ni am yr Eglwys Fore a
ddisgrifiwyd yn Actau 2: 42-47. Fe welsom ni
gymuned o Gristnogion a oedd yn llenwi eu
meddyliau â gwirionedd Duw ac yn rhannu eu
bywydau gyda Duw â’i gilydd. Pobl a oedd yn
gweddïo, moli, bwyta a chofio am farwolaeth Iesu
gyda’i gilydd. Fe nododd Andy mai wrth iddynt
hwy wneud y pethau hyn, fe wnaeth Duw
eu hamser gyda’i gilydd yn arswydus (a.43),
rhyfeddol (a.43) ac yn adegau pan oedd pobl
eraill yn dod yn Gristnogion (a.47). Dyma beth
oedd yr Eglwys, rhywbeth yr oedd pobl wrth eu
bodd yn bod yn rhan ohono! Hefyd gofynnodd David
Ollerton y cwestiwn, ‘Beth yw Eglwys?’ Yr ateb?
Pobl nid adeiladau. Anogodd David ni i
freuddwydio breuddwydion. Beth fyddai’n digwydd
petaem ni fel arweinwyr ifanc yn ymroi i wneud
i’r Eglwys weithio fel y dylai?
Yn ystod cwrs yr haf hwn, daeth yn glir i ni fod
rhaid i Souled Out ddatblygu yn rhywbeth mwy na
un cwrs ag aduniad bob blwyddyn. Penderfynwyd y
dylai Souled Out fod yn rhwydwaith o ffrindiau
yn rhannu’r un weledigaeth. Ac felly
penderfynwyd sefydlu 4 grŵp rhanbarthol a
fyddai’n cwrdd yn rheolaidd. Penderfynwyd hefyd
i ddechrau cynhyrchu cylchlythyr pob chwarter er
mwyn rhannu'r newyddion diweddaraf. Ac felly
wrth i ni gymryd y cam newydd hwn gyda’n gilydd,
rydyn yn edrych ymlaen at weld y pethau sydd gan
Dduw ar ein cyfer.
BETH DDIGWYDDODD WEDYN?
Ers yr haf mae pob grŵp rhanbarthol wedi bod yn
cwrdd yn gyson, gan fwyta, addoli, dysgu a
gweddïo gyda’i gilydd. Cafwyd amseroedd
bendithiol iawn wrth inni annog ein gilydd, fel
pobl ifanc, i ddysgu mwy am yr hyn mae’n ei
olygu i fod yn ddisgybl i’r Iesu. Hefyd, fel y
bwriadwyd, mae yna nifer o gylchlythyrau wedi eu
cynhyrchu, sydd wedi bod yn ffordd o gadw
cysylltiad gyda phawb, ac i wneud yn siŵr fod
gweledigaeth Souled Out yn aros yn fyw yng
nghalonnau pob un.
Cafwyd cyfle yn Ionawr i bawb ddod nôl at ei
gilydd i'r Aduniad, gyda dros ugain ohonom yn
bresennol, a rhai wynebau newydd hefyd yn ein
plith. Roedd y thema yn un a roddodd her amlwg i
bawb a oedd yno- Crëwyd ni i fod fel Crist - ac
roedd yn ffordd arbennig iawn o ddechrau
blwyddyn newydd.
|
