Dydd Sadwrn, Mawrth 8fed cafwyd Gwasanaeth o ddiolchgarwch am fywyd a gwaith  Siôn Ifan Evans yng Nghapel Tegid, Y Bala.  Roedd wedi gweithio yma yng  Ngholeg y Bala fel Is-Reolwr ac yn Swyddog Ieuenctid i’r Gwasanaeth Plant ac Ieuenctid.  ‘Roedd y cannoedd ddaeth ynghyd yn arwydd o sut oedd wedi cyffwrdd bywydau pob un a ddeuai i gysylltiad ag ef.  Siaradodd nifer o’i ffrindiau agos  amdano fel Siôn Tirgwyn, Siôn ym Mhrifysgol Bangor, Siôn y cyd weithiwr, Siôn yn y Bala, Siôn y tyst, Siôn yr Annibynnwr,  Siôn y crwydryn, Siôn drws nesa a Siôn y ffrind.  ‘Roedd dau beth yn glir am Siôn, sef ei ffydd yn yr Arglwydd a’i hiwmor ymhlith ei ffrindiau.  Daeth yr un adnod i’r amlwg gan sawl un o'r siaradwyr, sef  “Nid i ni, O Arglwydd, nid  i ni, ond i’th enw dy hun, rho ogoniant, er mwyn dy gariad a’th ffyddlondeb.” Salm 115:1  Bydd atgofion melys iawn gennym oll o Siôn a byddwn yn parhau gyda’i waith o ddyrchafu enw Iesu Grist a chyflwyno'r Efengyl i blant a phobl ifanc.