Ble ydw i?  Pwy Fuodd Yma 3

Cwrs Ieuenctid

Bu’r cwrs dwyieithog yma’n amser prysur a bywiog gydag ieuenctid o bob rhan o Gymru yn dod i Coleg y Bala am yr wythnos. Siôn oedd yr arwain, gyda chymorth Rhun, Gethin, Esyllt a fi. Fe fuom yn edrych ar yr Eglwys Fore yn ogystal â mwynhau llu o weithgareddau, addoliad a chymdeithasu.
Yn gyntaf fe edrychom ar neges Iesu i’w ddisgyblion yn Ioan 14, lle mae’n rhybuddio y bydd yn rhaid iddo Ef eu gadael ond y bydd yn anfon cynorthwywr, sef yr Ysbryd Glân. Yna, cawsom olwg ar ddigwyddiadau’r Pentecost – addewid Iesu’n cael ei gyflawni a’r Ysbryd yn disgyn ar y disgybion mewn ffordd rymus iawn. Helpodd hynny hwynt i rannu gyda’r bobl oedd yn gwrando, beth bynnag am eu hil a’u hiaith, yr hyn a ddigwyddodd i Iesu a pham roedd yn rhaid iddo farw ar y groes. Golygodd hynny fod dros 3,000 o bobl wedi edifarhau, gofyn am faddeuant, a dod i gredu yn atgyfodiad Iesu Grist.

Soniodd Rhun am sut gallwn ni ofyn am yr Ysbryd Glân ar unrhyw bryd – i’n helpu i ddeall y Beibl yn well, i roi sicrwydd yn ein calonnau ac i roi cryfder inni ar adegau anodd.

Cawsom hwyl wrth gyflwyno hanesion o lyfr yr Actau mewn ffyrdd gwahanol – drwy gyfres o luniau, clipiau fideo a sioe bypedau! Edrychodd un grŵp ar hanes Pedr a Ioan yn iachàu’r cardotyn, grŵp arall ar ymateb yr arweinwyr crefyddol i wyrthiau’r apostolion, a’r trydydd grŵp ar hanes Steffan yn cael ei labyddio. Roedd pob hanes yn dangos y ffordd bwerus roedd Duw ar waith gyda’r Apostolion, a sut roedden nhw’n barod i beryglu’u bywydau, a’i golli yn achos Steffan, dros yr Arglwydd Iesu.
Rhywbeth arall y cawsom olwg arno oedd y newid ym mywyd Paul. Roedd yn arfer erlid y Cristnogion cynnar yn filain, ond roedd gan Duw gynllun ar ei gyfer ac ar ôl ei droedigaeth daeth yn athro ac arweinydd pwysig.

Ar wahân i’r dysgu, cawsom lawer o weithgareddau hefyd – gêm wych o bêl-droed yn y Ganolfan Hamdden, mynd am dro yn yr haul o amgylch y llwybrau ger y Bala...ond y gweithgaredd sy’n aros yn fwyaf amlwg yn y côf ydi’r trip beicio i Feddgelert. Aeth un o’r arweinwyr (a gaiff aros yn ddienw – paid â phoeni, Gethin) ar goll yn y mynyddoedd, a bu’n rhaid treulio oriau’n chwilio amdano. Ond doedd hyn ddim yn ddrwg i gyd, oherwydd datblygodd i fod yn ddameg am sut mai Iesu ydi’r unig ffordd i Fywyd, a bod pob llwybr ond Ef yn mynd â ni i’r lle anghywir.

Roedd yn wych gweld ieuenctid o bob cefndir ac o’r ddwy iaith yn cymysgu’n naturiol, ac yn cael amser da wrth ddysgu am yr Efengyl.

Guto Dafydd

English