|
Ysgol Sul / Clwb y Mis
YSGOL SUL RHYDBACH
Helo bawb,
Wel dyma ni criw Ysgol Sul Rhydbach ym Motwnnog,
Pen Llŷn. Bob bore Sul am hanner awr wedi naw
ryda ni’n cyfarfod yn y Festri. A Festri werth
chweil ydi hi hefyd - do wir, Medi 2003 fe
gawsom ni garped newydd moethus ag ail beintio
hefyd mewn lliwia “peach” a teracota. Rhagfyr
2004 diflannodd y meinciau trwm pitch pein
(heblaw am ddwy bob ochor) a chafwyd cadeiria
cyfforddus yn ogystal a chadeiria a byrddau
bach i’r plant lleiaf. Mae hyn yn grêt - yn
enwedig pan yda ni isho chwarae gemau ag actio
ag ati gan eu bod mor hawdd i’w clirio i’r naill
ochor. Mae hyd yn oed yr oedolion hynaf i’w
weld wedi eu plesio pan fyddant yn mynychu
oedfaon gyda’r nos!!
Tua 25 o blant sydd yna - llawer ohonynt o’r un
teulu! Mae yna ddau deulu o 4 ag un o 3( a mwy i
ddod yn hwn!)
Mae hi wedi bod yn flwyddyn brysur hyd yma -
cafwyd sesiynau da iawn yn ystod yr Hydref wrth
ddilyn llyfr gwersi Gwyn Rhydderch - “Iesu’r
Ffrind”. Bu’r athrawon Anti Enid (dynas y piano
a’r canu), Anti Dilys (y Bos - neu Arolygwr a
deud y gwir) ag Anti Rhian ( pwy?) yn gneud y
gwersi fesul un ag yn cymryd yr Ysgol Sul i gyd
gyda’i gilydd yn hytrach na rhannu i
ddosbarthiadau oed. A bu Anti Gwyneth (sy’n
hoff iawn o’r Cola Bottles fyddwn ni’n cael cyn
mynd adre!) yn edrych ar ôl y plant lleiaf.
Mwynhaodd pawb yn fawr yn enwedig y gem “Yn y
môr/ ar y lan”. Profodd Elain a Lora yn anodd
iawn i’w trechu yn y gem yma! Roedd dysgu am
Iesu yn hwyl! Daeth Anna Jen o’r Cymorth
Cristnogol atom ni i gynnal gwasanaeth
Diolchgarwch. - ag fe glywsom ni i gyd pam mor
bwysig ydi hi i brynu nwyddau Fair Trade.
Drama am ddyn o’r enw Dafydd Smith, cogydd mewn
gwesty moethus oedd y Gwasanaeth Nadolig.
Helpodd Dafydd lawer o bobol dlawd a digartref
ar Noswyl Nadolig a derbyn bendith fawr o hyn.
Gwnaeth y plant eu gwaith yn ardderchog ac roedd
y gynulleidfa wedi mwynhau ac wedi dysgu gwers
syml hefyd gobeithio.
Wel roedda ni’n drist iawn pan naetho ni
ddychwelyd i’r Ysgol Sul ym Mis Ionawr - roedd
pawb yn son am drychineb y Tswnami. Roedda ni i
gyd wedi cael Nadolig da - digon o anrhegion,
bwyd da, a chyfle i fwynhau efo’n teuluoedd a
ffrindiau - ac roedd hyn yn rhoi rhyw gwmwl du
uwch ein pennau. Felly fe benderfynodd y plant
wneud taith gerdded i godi arian i helpu’r bobol
oedd wedi diodda. Geshwch be - casglwyd dros
£600! Da te - diolch i bawb o’r ardal wnaeth
gefnogi’r plant.
Bu criw o’r genod yn cynnal gwasanaeth mewn
Cartref Henoed yn Llanbedrog hefyd yn ystod mis
Ionawr - a chael llwyth o focsys siocled am eu
hymdrech!
Wel dyna chi ein hanes ni’n fras. Ryda ni’n
edrych ymlaen am gael darllen am Ysgolion Sul
eraill yn y dyfodol - a chofiwch - galwch os yda
chi’n pasio!
Hwyl fawr
Rhian
|
