Blwyddyn Gap
Beth ydy BLWYDDYN GAP?
Mae BLWYDDYN GAP yn gwrs ymarferol mewn magu disgyblion sy'n para blwyddyn (Medi-Awst) ac wedi ei leoli yng Ngholeg y Bala, Canolfan Plant ac Ieuenctid Eglwys Bresbyteraidd Cymru.
Amcanion
Amcanion BLWYDDYN GAP yw:
- annog datblygiad personol ac ysbrydol
- ymdrechu tuag at fod â chymeriad cynyddol Grist-debyg
- cynorthwyo pob myfyriwr i adnabod ei ddoniau a'i botensial
- datblygu sgiliau arwain, cyfathrebu ac adeiladu tîm effeithiol
- cynorthwyo a galluogi pob myfyriwr i ddirnad sut gyfraniad y gall ei wneud i'r Eglwys.
Cyfrifoldebau
Mae myfyrwyr yn cael cyfleon i brofi a bod yn rhan o'r gwahanol weithgareddau sy'n ymwneud â gwaith Coleg y Bala. Mae hyn yn cynnwys:
- paratoi a chyflwyno Cristnogaeth i blant ac ieuenctid mewn ffordd berthnasol a chyfoes ar gyrsiau penwythnos, haf a chanol-wythnos
- mynychu cyfarfodydd tîm: cymryd rhan yng ngwasanaeth dyddiol y ganolfan ac arwain yn achlysurol
- cynorthwyo gyda gwaith gweinyddol y ganolfan fel bo'r angen.
Mae cyfleon i'r myfyrwyr gymryd rhan mewn gweithgareddau plant ac ieuenctid tu allan i Goleg y Bala hefyd; rhai sy'n cael eu cynnal gan rai o weithwyr eraill Eglwys Bresbyteraidd Cymru. Mae hyn yn cynnwys paratoi a chymryd rhan yn y gweithgareddau canlynol:
- clybiau plant ac ieuenctid
- grwpiau canolog Souled Out
- gwasanaethau mewn ysgolion
- cenhadaeth leol
- ysgolion Sul
- gwasanaethau boreol mewn ysgolion cynradd ac uwchradd
- undebau Cristnogol
Caiff y myfyriwr gyfarfodydd rheolaidd gydag aelod parhaol o'r staff er mwyn archwilio'r dyddiadur a threfnu rhaglen waith addas.
Profiad o weithio mewn meysydd eraill
Yn ystod y flwyddyn, caiff y myfyriwr gyfle i weithio gydag arweinwyr neu weithwyr eglwysig mewn ardaloedd eraill. Yn ddibynnol ar leoliad, caiff y myfyriwr brofiadau amrywiol o weithio gyda phlant ac ieuenctid, ysgolion, oedolion a theuluoedd, yn ogystal â chyfle i ddatblygu ei ddealltwriaeth o rai agweddau ar waith bugeiliol ac arweinyddiaeth.
Dysgeidiaeth Feiblaidd a diwinyddol
Er mwyn dyfnhau dealltwriaeth ac ymwybyddiaeth feiblaidd pob myfyriwr, bydd pob myfyriwr yn treulio amser bob wythnos yn astudio'r Beibl a diwinyddiaeth. Mae'r rhaglen yn ymdrin â phynciau fel Trosolwg o'r Beibl, Dehongliad Beiblaidd, Athrawiaeth a Hanes yr Eglwys. Bydd y myfyriwr yn cael ei asesu'n rheolaidd drwy gydol y flwyddyn.
Cwnsela
Bydd pob myfyriwr yn derbyn cwnsela unigol yn ystod y FLWYDDYN GAP. Amcan y broses hon yw cefnogi duwioldeb a chymeriad Cristnogol pob myfyriwr.
Diddordeb?
Os oes gennych chi ddiddordeb mewn bod yn fyfyriwr BLWYDDYM GAP, cysylltwch â Choleg y Bala am wybodaeth bellach.
